هل تكمن سعادتنا فال (أنا)؟

هل تكمن سعادتنا فال (أنا)؟ 

شنو يعني ؟ (أنا) 

أنا ليست فقط حب الذات فيما يرضي الله .. ال (أنا) يعني ابدي نفسي على كل شيء و كل شخص .. 

مو مهم اهل مو مهم ابناء مو مهم زوج الاهم راحتي و وناستي و متعتي .. 

هذا اللي تعلمته لما نصحوني اخذ دورات حب الذات .. طبعاً تختلف المسميات ولكن المحتوى واحد ..

هل وجدت سعادتي ؟ هل ارتحت ؟ هل لقيت ذاتي ؟

أبداً .. صرت بحاله تعيسه واحس كل الوقت بضيقه لان ال ( أنا) تخالف فطرتنا 

ربي زرع فينا العواطف زرع فينا المحبه .. زرع فينا العطاء وحب الخير والتعاون .. شلون بننجح بروحنا ؟ 

المكان الوحيد اللي بنكون فيه بروحنا بالقبر ودايما نسال الله للاموات ان يأنسهم في وحدتهم .. فكيف سنسعد بالوحده ..

عن نفسي ما اتحمل اكون بروحي اكثر من يوم ولا ممكن القى سعادتي بتهميش الاشخاص اللي بحياتي .. 

شلون نتغلب على الضغوطات ؟ شلون نتجاوز الاحزان ؟ شلون نكون سعداء ؟ 

كلما عرفنا الله كلما شعرنا بالراحه والسعاده اكثر 

النيه النيه النيه 

حبوا كل شيء تسوونه بس حبوه فالله وانووه لله 

مثال : 

صلة الرحم احياناً نحسها ثقيله وما نبي نزور و نبي نطلع مع ربعنا اونس .. تذكروا اجر صلة الرحم و انوو الصله لله و كل كلمه تضايق تتحملونها تذكروا الاجر و تذكروا بيوم من الايام بتتمنون احد يسال عنكم .. سووه شيء مع صلة الرحم يسعدكم انتوا مثال لعبه ممكن تلعبونها مع يدتكم او كيكه بخاطركم تذوقونها اخذوها معاكم .. 

وتاكدوا ٩٠٪؜ من عيالكم باجر راح يشبهونكم .. بروا اهلكم لله وربي راح يرزقكم من يبر فيكم وان ما رزقكم عيال بسخرلكم من يقوم فيكم 

الصدقه .. العطاء تذكروا تجمعون معاهم النيه و والله وبكل ثقه اقولكم بترجع لكم بطريقه تجبركم .. 

مهما كانت ظروفكم تذكروا النعم لا تذكرون الظروف السيئه وبس .. 

اضطريتوا تكونون مرافق مريض استمتعوا بالاجر ربي اختاركم من بين الكل لهالاجر لا تفكرون شنو خسرتوا في هالوقت .. استمتعوا بقربكم من هالمريض و فكروا شنو ممكن تستغلون هالوقت فيه ؟ قرائة كتاب مع المريض .. وجبه و ضحكه و تخفيف الم .. يمكن تكتشفون موهبه يديده بنفسكم 

بحثوا عن ذاتكم و عن سعادتكم مع الغير 

ممكن تكون سعادتكم بالعطاء و بحب الغير 

مثال : 

بالنسبه لي وايد كنت اسمع كلمة امبي بدعتي كل ما صار معاج فلوس شريتي شيء حق فلان و علان ؟؟

شريت حق نفسي وبس و همشت الكل ما حسيت بسعاده سبحان الله ..

ولكن كل ما شريت شيء واهديت شخص بنية ادخال السرور سبحانه ربي يجبرني ويعوضني وسعادتي وااااايد اكبر وربي يسخرلي من يهديني سبحان الله 

لان الله كريم مايرضى البشر يكونون اكرم منه .. نويت ادخال السرور شلون ما راح يدخل السرور في قلبي ؟ مع ان والله شوفة الناس سعيده بهديه بسيطه شعور لا يوصف .. 

والصدقه حتى لو ما كان معانا غير مبلغ بسيط سبحان الله ربي يبارك و يعوض 

ترا حتى الوقت نتصدق فيه .. فنلاقي بركه في وقتنا 

لما نخصص وقت من يومنا في زياره قريب او ادخال سرور بشرب قهوه مع انسان غالي او في قراءة كلام الله والتعلم عنه اكثر .. 

تبون السعاده ؟ 

السعاده بالقناعه والرضى بما قسمه الله لنا 

ولكن ما نقول بعد شنو نسوي كله امر الله ولا نقول الحمد الله على كل حال بثقل .. 

نرضى من داخلنا من قلبنا و نستشعر النعم ونقتنع قناعه تامه بكل ما قسمه الله .. من يعرف الله يعرف السعاده 

يمكن الناس تقول وااااي الله ياجرها ويعينها وقتها مو لها 

لكن محد يدري هالانسانه شكثر حاسه بنعمه وسعاده وان المنه عليها لان الله اختارها تقوم بهالمهام 

انتوا بس اللي تقدرون تسعدون نفسكم حسب ظروفكم ولا يهمكم كلام الناس 

الله جل جلاله ثم والديكم ثم كل شيء يالحياة

واستفيدوا من سيره الرسول صلى الله عليه وسلم

وايد وصلني كلام واساله شلون اغلب وقتج مع اهلج ؟

انا بشر حالي حالكم وابي اعيش وابي استانس بس احاول استانس معاهم وافرح بفرحهم .. اكيد انضغط واكيد ابي وقت لنفسي بس كل شيء له وقته .. حاولوا تستمتعون في بركم لهم لان احنا بحاجتهم اهما مو بحاجتنا 

اسال الله لي ولكم العفو والعافيه وسعاده دائمه و كل الرضى